წიწაკის ქარვისფერი მწნილი – მოვემზადოთ ზამთრისათვის

ინგრედიენტები :

5 კილო სამწნილე წიწაკა

3 სუფრის კოვზი თავდადგმული მარილი 2 ლიტრიანი ქილიასათვის

4 სიმინდის ფუჩეჩი 2 ლიტრიანი ქილისათვის. სწორედ რომ,სიმინდის ფუჩეჩი აძლევს კარგ ქარვისფერს.

2 ქოლგიანი კამა 2 ლიტრიანი ქილისათვის

5 დაფნის ფოთოლი

მომზადების წესები :

წიწაკა მაგიდაზე გაშლილად დავაწყოთ და 2-3 დღე გავაჩეროთ,რომ შეჭკნეს.

შემჭკნარი წიწაკები გავრეცხოთ,  ჩანგლით დავჩხვლიტოთ  ან ბოლოები ჩავუჭრათ,ყუნწები ცოტათი წავაჭრათ და ფენა-  ფენა ჩავაწყოთ ქილებში,ფენებს შორის ჩავაყოლოთ კამა,დაფნის ფოთოლი ,სიმინდის ფუჩეჩი.

ცივ წყალში გავხსნათ არაიოდიზირებული მარილი და სითხით შევავსოთ წიწაკით სავსე ქილები,დავადოთ სიმძიმე ,დავაფაროთ თავსახური და გავაჩეროთ 10 დღე.

მე-11 დღეს წიწაკები დავაწყოთ თუშფალანგზე,დავწრიტოთ,წყალი გადავღვაროთ და იგივე წესით მოვამზადოთ ახალი მარილწყალი.

დაწრეტილი წიწაკები ნაზად ჩავტკეპნოთ ქილებში,რომ არ გაიხეს,დავასხათ მარილწყალი ,ზემოდან მოვასხათ 1 სუფრის კოვზი გადადუღებული  ძმარი ან მოვაყაროთ  ცოტა ლიმონმჟავა,დავაფაროთ სიმინდის ფუჩეჩი და დავაფაროთ პლასტმასის თავსახური.

ცალკე გადავინახოთ მარილწყალი,,რადგანაც წიწაკები დაიწევს და ამ სითხით შევავსებთ სიცარიელეს.ამავე დროს ს თავიდან ავიშორებთ წიწაკის  ზედა ფენის გაშავებას

 

 

 

წიწაკა ზეთში,ქართული მწნილი – მოვემზადოთ ზამთრისათვის

ინგრედიენტები :

5 კგ.წიწაკა

250  -300 გრ.ნიორი

90 გრ.შაქარი

4 სუფრის კოვზი მარილი

700 მლ.ძმარი

500 მლ.ზეთი

10 მარცვალი შავი წიწაკა

5 დაფნის ფოთოლი

70 გრ.ქინძი

80 გრ.ნიახური

80 გრ.ოხრახურში

მომზადების წესები :

ტკბილ წიწაკებს მოვაჭრათ ყუნწები და წვეროები ჩავუჭრათ.

მწვანილები გავრეცხოთ და გავამშრალოთ.

ნიორი და მწვანილები დავჭრათ.

ალუმინის ქვაბში ჩავასხათ ზეთი და ძმარი.მასში ჩავყაროთ წიწაკის მარცვლები,შაქარი,მარილი,დაფნის ფოთლები და ავადუღოთ.

ადუღებულ მასაში ნაწილ – ნაწილ ვშუშოთ წიწაკები 5-10 წუთი,ბოლოს მწვანილები და ნიორი დავაყაროთ და ერთიანად ვშუშოთ.

ზეთიანი წიწაკები ცხელ –  ცხელი ჩავასხათ სტერილურ ქილებში,პირამდე ავავსოთ,გავაპიპინოთ,მოვხუფოთ და შეფუთული გავაგრილოთ.

ქართული მწნილი , წიწაკა ზეთში ძალიან  გემრიელია !

 

კიტრის მწნილი (ძმრის გარეშე) ალუჩით ან ტყემლით

ინგრედიენტები  ერთი (750 მლ) ქილისათვის :

2 მუჭა ალუჩა ან ერთი მუჭა ტყემალი

კიტრი

2 კბილი ნიორი

1 ს.კოვზი შაქარი

0,5 ს კოვზი მარილი

2 ალუბლის ფოთოლი

კამა

350-400 მლ.წყალი

მომზადების წესები :

ქორფა,შუშა,გრძელი,წვრილი კიტრი გავრეცხოთ და გავაჩეროთ ცივ წყალში 30 წუთი.

გარეცხილ ქილებში ფენა-ფენა ჩავაწყოთ  ერთი მუჭა ალუჩა, კიტრი,ნიორი,კამა, ალუბლის ფოთოლი, მეორე მუჭა ალუჩა, დავასხათ  ადუღებული  წყალი დავახუროთ თავსახური   და ვაცადოთ სითხეს გაციება.

სითხე გადავაქციოთ.

ხელახლა ადუღებული  მარილიანი და შაქრიანი    წყალი დავასხათ  და იქვე მოვხუფოთ.

 

თხილიანი აჯიკა -გურული სამზარეულო

ინგრედიენტები;

200 გრ.მწარე მწვანე წიწაკა

50 გრ.მწვანე ბულგარული

15 გრ.ნიორი

200 გრ.მაცვლოვანი ქინძი

500 გრ.გარჩეული წიწაკა

20 მლ.ძმარი

გადადუღებული წყალი საჭიროებისამებრ

5 გრ.უცხო სუნელი

5 გრ.ხმელი ქინძი

მარილი გემოვნებით

 

მომზადების წესები:

ქინძს მოვაცალოთ მარცვლები,ყლორტები და ღეროები გადავყაროთ.

ნიორი გავარჩიოთ.

წიწაკა გავრეცხოთ,გამოვაცალოთ თესლები და გავამშრალოთ.

თხილი,ქინძი,ნიორი,წიწაკები გავატაროტ ხორცსაკეპსი,გავათხელოთ ძმრით და წყლით,დავუმატოთ სუნელები და მარილი.

ხრახნიანი მინის ქილა  ბოლომდე შევავსოთ აჯიკით,შევინახოთ გრილ და ბნელ ადგილას.

 

 

 

სასიამოვნო ქლიავის მარინადი ზამთრისათვის

ინგრედიენტები :

1,5 კგ ქლიავი

ნახ.ლიტრა ძმარი

1 ჭიქა წყალი

2 ჩ.ჭიქა შაქარი

1 ჩ.კოვზი მარილი

1 ჩ.კოვზი დარიჩინი

5-6 ცალი მიხაკის ბუტკო

1-2 ცალი დაფნის ფოთოლი

2 ბაჰარი

2 შავი პილპილის მარცვალი

მომზადების წესები :

1 ლიტრიან ქილებში ჩავყაროთ  გარეცხილი ქლიავი.ქლიავი უნდა იყოს ცოტა მკვახე.

ქვაბში ჩავყარო შაქარი,ბაჰარი,მარილი,პილპილი,დაფნის ფოთოლი,მიხაკი,დარიჩინი,დავასხათ წყალი,ძმარი და მოვადუღოთ მარინადი.

ქლიავს დავასხათ მოდუღებული მარინადი ბოლომდე,გავაპიპინოთ,თითქმის უნდა გადმოდიოდეს,დავახუროთ თავსახური და 5 წუთი გავუკეთოთ სტერილიზაცია.

 

 

კიტრის მწნილი ქართულად

ინგრედიენტები:

1 კგ .კიტრი

100 გრ.ნიახური

100 გრ.ოხრახურში

50 გრ.კამა

50 გრ.ნიორი

მარინადისათვის:

2 ლიტრი წყალი

30 გრ.მარილი

4-9 გრ.წიწაკა

5 გრ.ბაჰრი

4 ცალი დაფნის ფოთოლი

 

მომზადების წესები :

გარეცხილი კიტრი,გაფცქვნილი ნიორი,დაჭრილი მწვანილი ფენა-ფენა ემალის ჭურჭელში ჩავაწყოთ.

წყალში ჩავყაროთ მარილი,წიწაკა,ბაჰარი,დაფნის ფოთლები და წამოვადუღოთ.

მიღებული სითხე მოვასხათ კიტრს ისე,რომ მთლიანად დაიფაროს,მჭიდროდ დავახუროთ თავზე და დავდგათ გრილ ადგილას 6-7 დღე.

იმავე წესით მოვამზადოთ კიტრის მწნილი შესანახად ზამთრისათვის.ასეთ შემთხვევაში ქორფა,შუშა,გრძელი,წვრილი კიტრი გავრეცხოთ და გავაჩეროთ ცივ წყალში 30 წუთი.

გარეცხილ ქილებში ფენა-ფენა ჩავაწყოთ კიტრი,ნიორი,ნიახური,კამა,დავასხათ  ადუღებული  წყალი (3 ლიტრიან ქილში ჩავდოთ 2-3 ალუბლის ფოთოლი),დავახუროთ თავსახური   და ვაცადოთ სითხეს გაციება.

სითხე გადავაქციოთ.

ხელახლა ადუღებული  მარილიანი (5 ლიტრა წყალი,1 ჩ.ჭიქა მარილი,1 სუფრის კოვზი შაქარი,  ერთი პატარა ღვინის ჭიქა ძმარი)   წყალი დავასხათ  და იქვე მოვხუფოთ.

მოგეწონათ რეცეპტი? გთხოვთ,გაუზიარეთ მეგობრებს.

 

 

 

 

 

 

 

მწვანე პამიდვრის მწნილი

ინგრედიენტები :

3 კგ მწვანე პამიდორი

500-600  გრ.ნიახური

500-600 გრ.ოხრახურში

200 გრ.კამა

100-120  გრ.ნიორი

10  დაფნის ფოთოლი

წითელი წიწაკა გემოვნებით

3 ლ.წყალი

180 გრ.მარილი ან გემოვნებით

1,5 ჩ.კოვზი შაქარი

 

მომზადების წესები :

მკვახე პამიდორი ჩავჭრათ შუაში.

მწვანილები გავრეცხოთ,დავჭრათ ფოთლები და ღეროები შევინახოთ.

მწვანილის ფოთლები ნიორთან ერთად გადავანაწილოთ პამიდვრის ჩაჭრილ გულში.

მინის ქილებში ერთ ფენად ჩავაწყოთ პამიდვრები,დავაყაროთ მწვანილის ღეროები,ნიორი,დაფნის ფოთოლი,წიწაკა.

ასეთი თანმიმდევრობით ჩავაწყოთ რამდენიმე ფენა.

ავადუღოთ მარილიანი წყალი( 1 ლიტრა წყალს დავუმატოთ 1 ჩ.კოვზი შაქარი და 60 გრ.მარილი),გავაციოთ , დავასხათ პამიდვრებს ისე,რომ დავფაროთ და მოვხუფოთ.

 

 

 

 

 

 

წიწაკის მწნილი

ინგრედიენტები:

1 კგ.მწვანე სამწნილე წიწაკა ან ბულგარული წიწაკა

100 მლ ზეთი

1 ს.კოვზი შაქარი

50 გრ.ნიორი

200 მლ.თეთრი ღვინის ძმარი

30 გრ.მარილი

5 გრ.ბაჰარი

3-4 ცალი დაფნის ფოთოლი

100 გრ.ნიახური

50 გრამი  ოხრახურში

 

მომზადების წესები:

წიწაკა გავრეცხოთ,ბოლოები ჩავჭრათ,ჩავყაროთ მდუღარე წყალში ,  წამოვადუღოთ, გადავიტანოთ ცივ წყალში .რომ შეგრილდება,ამოვიღოთ და კარგად გავწუროთ.

ლიტრა წყალში ჩავყაროთ მარილი,შაქარი, დაჭრილი ნიახური,ოხრახურში,ჩავასხათ ზეთი,ძმარი  ავადუღოთ და გავაგრილოთ.

წიწაკა მჭიდროდ ჩავტენოთ მინის ქილებში,ჩავაყოლოთ ნიორი,დაფნის ფოთოლი,ბაჰარი  ,დავასხათ მარინადის წყალი და გავუკეთოთ სტერილიზაცია 10 წუთი,შემდეგ კი მოვხუფოთ.